Хусановтың клубы АПЛ-мен құпия келіссөздер жүргізді
«Манчестер Ситидегі» қаржылық жанжал жаңа сипат алды, деп хабарлайды Sports24.kz.
Bloomberg мәліметінше, клуб қаржылық заңбұзушылықтарға қатысты айыптар бойынша Англия Премьер-лигасымен бітімге келу жөнінде алдын ала келіссөздер жүргізген. Бұл — «қалалықтарға» төніп тұрған ауқымды санкцияларды жеңілдетуге жасалған, бұған дейін жарияланбаған әрекет.
Бітімге келу туралы талқылаулар тәуелсіз комиссия өткен айдың соңында жойқын үкім шығарғанға дейін өткен. Комиссия «Сити» Абу-Даби қаржыландырған жалған коммерциялық мәмілелер арқылы өзінің қаржылық көрсеткіштерін 900 миллион фунт стерлингтен астам сомаға жасанды түрде арттырғанын және бұл жағдай тағылған 115 айыптың 114-іне қатысты екенін анықтаған.
Жағдайдан хабардар адамдардың айтуынша, клуб өзінің кінәсіз екенін үнемі мәлімдегендіктен, келіссөздер тез арада сәтсіз аяқталған. Ұсынылған келісім ең қатаң жазаларды — төменгі дивизионға түсіру немесе титулдардан айыруды емес, қомақты қаржылық төлем жасауды көздеген.
Премьер-лига ісінің ауқымын ескерсек, кез келген келісім істі толық шешпей, санкция көлемін ғана азайтуы мүмкін еді. Клуб пен лига өкілдері түсініктеме беруден бас тартты.
«Манчестер Сити» комиссияның үкіміне апелляция бермек. Клуб бұл шешімде құқық, қағидаттар мен фактілерге қатысты елеулі әрі анық қателер бар деп санайды. Ал Премьер-лига ережесіне сәйкес, апелляция бойынша шешім ақпан айының басына дейін жариялануы тиіс.
Бұған дейін «Манчестер Сити» көшбасшысының жанжал аясында клубтан кетуі мүмкін екенін хабарлаған едік.
