Холанд УЕФА Ұлттар лигасындағы 22-голын соқты. Роналдудың көрсеткіші қандай?
Норвегия УЕФА Ұлттар лигасының екінші кезеңінде Португалиямен кездесіп жатыр. 65-минутта «Манчестер Сити» шабуылшысы Эрлинг Холанд матчтағы есепті теңестірді, деп хабарлайды Sports24.kz.
Диогу Кошта Эдегордың соққысын қайтарды, алайда Патрик Бергтің пасынан кейін Холанд допты бәрібір қақпа торына бағыттай алды. Бұл шабуылшының мансабында Португалияға қарсы соққан алғашқы голы болды.
Алайда норвегиялық футболшының ұлттық құрамадағы статистикасы бұдан да әсерлі болып шықты. Холандтың ұлттық құрама сапында 57 матчта 65 голы бар. Шабуылшы бұған қоса 72 нәтижелі әрекетімен көзге түскен.
Холандтың Ұлттар лигасындағы соңғы голы айрықша маңызды болды. Норвегиялық форвард бұл турнирдегі гол санын 22-ге жеткізіп, турнир тарихындағы ең үздік сұрмерген мәртебесін нығайтты.
