Хаби Алонсо «Реалға» шарт қойды: бас бапкер болу үшін үш трансфер талап етті

Футбол 30 сәу 2025 10:48

Арсен Алиев

Редактор

Испаниялық маман Хаби Алонсо 2024/25 маусымы аяқталған соң мадридтік «Реалдың» бас бапкері атануы мүмкін негізгі үміткер ретінде қарастырылып отыр.

AS басылымының мәліметінше, ол клуб басшылығына нақты талап қойған - құрамды үш белгілі футболшымен күшейту.

Ақпарат көздерінің хабарлауынша, Алонсо қазіргі командасы - леверкузендік «Байердің» екі ойыншысын сатып алуды сұрап отыр. Бұл - команда қорғанысының тірегі саналатын орталық қорғаушы Йонатан Та және шабуылшы жартылай қорғаушы Флориан Вирц. Сонымен қатар, маман мадридтік клубтың сапында «Реал Сосьедадтың» жартылай қорғаушысы Мартин Субименди де болуын қалайды.

Бұған дейін БАҚ-та 43 жастағы бапкердің «Реалмен» келісімшартқа жақын екені туралы ақпарат тараған. Мәміле маусым соңында жасалуы мүмкін.

Еске салайық, Хаби Алонсо «Байер» клубын 2022 жылы қабылдап алған болатын. Оның жетекшілігімен команда тарихында тұңғыш рет Германия чемпионы атанды. Қазіргі келісімшарты 2026 жылдың жазының соңына дейін күшінде.

Байланысты командалар мен лигалар

Реал Мадрид

Байер