ҚФФ ауқымды реформаларды дайындап жатыр: өңірлердегі футболды дамыту жөніндегі комиссия
Қазақстанда өңірлердегі футболды дамыту мәселелері бойынша сараптамалық комиссия құрылуы мүмкін.
Бұл ұсынысты Қазақстан футбол федерациясының президенті Әділет Барменқұлов Мәжілісте өткен дөңгелек үстелде айтты. Іс-шара қазақстандық спорттағы этика, фэйр-плей қағидаттары және сыбайлас жемқорлықпен күрес мәселелеріне арналды.
Бұған дейін Қасым-Жомарт Тоқаев елдегі спорттың дамуының олқылықтарына назар аударып, сала мамандарын сынға алған болатын. Сонымен қатар, ол спорт саласындағы заңнаманы реформалау қажеттігін де атап өтті. Өз сөзінде Барменқұлов Қазақстан футбол федерациясының халықаралық тәжірибесімен бөлісіп, УЕФА және ФИФА-мен бірлесе жұмыс жасайтын жобаларды жүзеге асыру барысында сарапшылар алқасы алдында өз ұсыныстарын қорғауға мәжбүр болатынын, әрі олар жобаның толықтай жүзеге асуын қадағалайтынын айтты.
Барменқұлов осындай жүйені Қазақстанның өңірлеріндегі футболдың дамуына бақылау жасау үшін қолдануға болатынын ұсынды. Оның айтуынша, комиссия құрамына жергілікті атқарушы органдардың өкілдері, федерация мен ПФЛК мамандары, сондай-ақ бақылау және ревизиялық органдар мен қоғамдық қадағалау институттары кіруі мүмкін. Федерация басшысы бұл комиссияға қатысты дайын реттеуші құжаттар бар екенін, сондай-ақ өтінім беру және қаржыландыру тетіктері әзірленгенін мәлімдеді. Әділет Барменқұловтың сөзінше, әрбір инвестицияланған теңге тиімді жұмсалуы тиіс.
Өз сөзінде ҚФФ басшысы ұлттық құраманың жай-күйі мен қазақстандық футболшылардың ел чемпионатындағы ойын уақытына қатысты сұрақтарға да жауап берді. Барменқұлов қазақстандық футболшылардың өз командаларында жиі ойын практикасын алып жүргенін, ал легионерлерге қатысты лимиттің жойылуы клубтардың құрамындағы жергілікті ойыншылар санына еш әсер етпегенін атап өтті.
Ұлттық құраманы талқылай отырып, Барменқұлов Еуро-2024 турниріне іріктеуіндегі Грекияға қарсы өткен плей-офф матчы команданың 2022-2023 жылдардағы сәтті ойындарынан кейін ескі тактикасының мүмкіндіктерін сарқығанын көрсетті деп мәлімдеді. Сондықтан командаға жаңа ойын стиліне көшу қажеттігі туындады. Ол ұлттық құраманың болашақта табысқа жетуі тек шабуылдаушы стильді дамыту арқылы мүмкін болатынын, бұл тактика қазіргі уақытта U-15 құрамасынан бастап барлық қазақстандық командаларда енгізіліп жатқанын айтты.
Сонымен қатар, ҚФФ басшысы Станислав Черчесовтың еңбегіне жоғары баға беріп, оның басшылығындағы құраманың жетістігі тек уақыттың еншісінде екенін жеткізді.
