Фавориты анықталды: Қырғызбаева Әйелдер лигасы-2025 маусымының басты үміткерлерін атады

Футбол 22 сәу 2025 07:44

Арсен Алиев

Редактор

Қазақстан әйелдер құрамасының бас бапкерінің көмекшісі Бегаим Қырғызбаева 2025 жылғы маусымда Қазақстан чемпионатының басты фавориттері жайлы өз пікірін білдірді.

Оның айтуынша, алтын жүлде үшін басты тартыс «БИИК-Шымкент» пен «Актобе» клубтарының арасында өтпек. Бұл екі команда да 2025/26 маусымында Қазақстан атынан Чемпиондар лигасында өнер көрсетеді.

- «Бұл командалар құрамын мықты легионерлермен және ұлттық құраманың көшбасшы ойыншыларымен күшейткен. Сондықтан оларды чемпиондыққа басты үміткерлер деп сенімді түрде айтуға болады», - деді Қырғызбаева Қазақстан футбол федерациясының баспасөз қызметіне берген сұхбатында.

Сонымен қатар, маман алдағы маусымда «Қайратты» сенсация жасауы мүмкін команда ретінде атап өтті:

- «Алматылық клуб сапында ұлттық құрамаға шақырту алып жүрген жас әрі дарынды футболшы қыздар ойнайды. Өткен маусымда «Қайрат» жастар командалары арасында Қазақстан чемпионы атанған болатын. Бұл – клубтың болашаққа жүйелі жұмыс жасап жатқанын көрсетеді», - деді ол.

Айта кетейік, өткен маусымның чемпиондары - «БИИК-Шымкент», ал «Актөбе» екінші орынды иеленген. Жаңа маусымда бұл екі команда Чемпиондар лигасының екінші іріктеу кезеңінен бастайды: «БИИК» - чемпиондар жолымен, ал «Актөбе» - лигалар жолымен.