Астана-Челси: шешім Астана-Арена стадионының жөндеу жұмыстарының аяқталуына байланысты қабылданады

Футбол 03 қаз 2024 16:33

“Астана” - “Челси” матчын “Астана Аренаға” ауыстыруы мүмкін. Бұл туралы елордалық клубтың маркетинг және қоғаммен байланыс бөлімінің басшысы Қайсар Бекенов Qazsport ұлттық спорт телеарнасына берген сұхбатында мәлімдеді.

“Қазіргі уақытта матчтың қайда өтетіні туралы нақты ақпарат жоқ. Өйткені бәрі “Астана Аренадағы” жөндеу жұмыстарына және УЕФА-ның шешіміне байланысты. Жанкүйерлер біздің таңдауымызға қарамастан, УЕФА оны өзгерте алатынын түсінбейді. Олар бізге “негізгі стадион ретінде алматылық “Орталық” көрсетілген” деп айтуы мүмкін. УЕФА өкілдері егер өзгерістер болатын болса, алдын ала хабарлауымызды сұрады. Сондықтан, әзірге матчтың қай жерде өтетінін — Астанада ма, әлде Алматыда ма — ресми түрде айта алмаймыз”, — деді Қайсар Бекенов.

Қазіргі уақытта УЕФА сайтында 12 желтоқсанға жоспарланған “Астана” - “Челси” матчының өтетін орны ретінде Алматыдағы Орталық стадион көрсетілген. “Астана” жанкүйерлері матчты елордаға ауыстыруды сұрап, Президент Тоқаевқа петиция жолдады.

“Астана Аренада” жөндеу жұмыстары жалғасуда, олар желтоқсан айының басында аяқталады деп жоспарланған. УЕФА регламентіне сәйкес, матчтың өтетін орнын өзгерту форс-мажорлық жағдайлар кезінде ғана мүмкін болады.

Танымал жаңалықтар