Абат Айымбетов «Крылья Советов» құрамын толықтырмайды: клуб трансферден бірауыздан бас тартты
Қазақстан құрамасының 29 жастағы шабуылшысы Абат Айымбетов самаралық «Крылья Советов» командасына ауыспайтын болды.
Бұл туралы Telegram-дағы «Топи за «Крылья» арнасы хабарлады.
Дереккөздің мәліметінше, трансфер идеясына скауттар бөлімі де, клуб басшылығы да, сондай-ақ бас бапкер Магомед Адиев те қарсы болған. Айта кетерлігі, Адиев Айымбетовпен бұрыннан таныс және жылы қарым-қатынаста болса да, ол да шабуылшының команданы күшейте алмайтынын мойындаған.
Жаңа бапкер тағайындалғаннан кейін клуб ішінде алғаш рет барлығы ортақ пікірге келді — тәжірибесіне қарамастан, Айымбетов «Крылья Советов» клубының қазіргі мақсаттарына да, РПЛ деңгейіне де сай емес деп танылды.
Айта кетейік, Айымбетов Түркияның «Адана Демирспор» клубында 37 ойын өткізіп, 6 гол соққан. Самара клубының тізгінін Магомед Адиев 5 маусымда қолына алған болатын.
Байланысты командалар мен лигалар
