Жәнібекке қарсылас атануы мүмкін Юбэнк керемет жеңіске жетіп, әкесінің жетістігін қайталады

Бокс 26 сәу 2025 18:57

26 сәуірден 27 сәуірге қараған түні Лондондағы «Tottenham Hotspur Stadium» аренасында орта салмақта (72,6 кг дейін) британдық Крис Юбэнк-кіші (35-3, 25 КО) мен Конор Бенн (23-1, 14 КО) арасындағы көптен күткен бокс жекпе-жегі өтті.

Бұл кездесуді ерекше еткен тағы бір фактор — қос боксшының әкелері 1990 жылы рингте жолыққан болатын. Ол кезде Крис Юбэнк Найджел Беннді нокаутпен жеңіп, WBO нұсқасы бойынша әлем чемпионы атанған еді.

Араға 35 жыл салып, Юбэнк-кіші әкесінің жетістігін қайталады. Конор Бенн жекпе-жекте бар күшін салғанымен, 12 раундқа созылған тартысты айқаста Юбенк төрешілердің бір ауыздан шығарған шешімімен жеңіске жетті — 116:112, 116:112, 116:112.

Осылайша, Крис Юбэнк кәсіби мансабындағы 35-ші жеңісіне қол жеткізді, ал Конор Бенн алғаш рет жеңілістің кермек дәмін татты. Айта кетейік, Юбэнк-кіші қазіргі таңда IBO нұсқасы бойынша орта салмақтағы әлем чемпионы.

Бұған дейін британдық боксшыға қазақстандық Жәнібек Әлімханұлымен (17-0, 12 КО) жұдырықтасу ұсынылған еді, бірақ Юбэнк бұл кездесуден бас тартқан болатын.

Алайда Беннді жеңген соң, Крис Юбенк-кішінің Жәнібек Әлімханұлына қарсылас атану мүмкіндігі қайта артып отыр.