Шавкат Рахмонов желтоқсанда UFC чемпионы атағы үшін Белал Мұхаммадпен кездеседі

Бокс 12 қаз 2024 13:27

UFC президенті Дана Уайт жеңіліс дәмін татпаған қазақстандық файтер Шавкат Рахмонов (18-0) пен жартылай орта салмақтағы промоушен чемпионы Белал Мұхаммад (24-3) арасындағы жекпе-жекті жариялады. Жекпе-жек 8 желтоқсан күні АҚШ-тың Лас-Вегас қаласында өтетін UFC 310 турнирінде өтеді.

“7 желтоқсан күні (Қазақстан уақыты бойынша 8 желтоқсан) Лас-Вегастағы T-Mobile Arena-да UFC чемпионы Белал Мұхаммад пен Шавкат Рахмонов басты жекпе-жекте кездеседі”, – деді Уайт.

Айта кетейік, Рахмонов UFC-де алты рет қатарынан мерзімінен бұрын жеңіске жетті. Өткен жылдың желтоқсанында ол америкалық Стивен Томпсонды (17-7-1) артынан қылқындырып, жеңіске жетті.

Белал Мұхаммад биылғы шілде айында Манчестерде (Англия) өткен UFC 304 турнирінде британдық Леон Эдвардсты төрешілердің бірауызды шешімімен жеңіп, UFC жартылай орта салмақтағы жаңа чемпионы атанды.

Танымал жаңалықтар