Бокстан ел біріншілігінде жартылай финалға жолдама алған боксшылар анықталды
Қарағанды қаласында өтіп жатқан бокстан ересектер арасындағы Қазақстан чемпионатының төртінші күнінде жартылай финалға шыққан боксшылар белгілі болды.
51 келіде топ жарған Даниал Сәбит (Батыс Қазақстан облысы) Алмас Хинкинді екінші раундта мерзімінен бұрын жеңіп, өзінің тамаша физикалық дайындығын көрсетті. Енді жартылай финалда ол алматылық Ернұр Қайратпен кездеседі. Тағы бір жұпта ақтөбелік Бекзат Алдамжаров пен қарағандылық Рамазан Нұрлыбаев бәсекеге түседі.
60 келіде жартылай финалға өткен боксшылар алдыңғы жекпе-жектерде айқын басымдық танытып, қарсыластарын жеңіп шыққан. Ал 1/2 финалда Серік Теміржанов (Павлодар облысы) мен Шыңғыс Мусинов (Ақмола облысы), Талғат Сырымбетов (Қарағанды облысы) мен Евгений Павлов (Солтүстік Қазақстан облысы) бақ сынасады.
67 келіде болашағынан көп үміт күттіретін Сабырхан Төрехан жекпе-жексіз жартылай финалға жолдама алды. Ол енді жастар арасындағы Азия чемпионы Бақтияр Анарбаевпен күш сынасады. Сондай-ақ, Елнұр Сүйінбай, Санәтәлі Төлтаев және Нұржан Аманкелді де қарқынды өнер көрсетіп, қарсыластарын жеңді.
75 келіде Нұрқанат Райыс пен Тимур Нұрсейітов жартылай финалға сенімді түрде өтті. Олар 1/2 финалда Нұрқанат Райыс (Атырау облысы) пен Мақсат Өтегенов (Абай облысы), Тимур Нұрсейітов (Астана) мен Бақберген Әлиасқаров (Астана) кездеседі.
80 келіде тартысты сәттер мен нокдаундар бокс сүйер қауымды тамсандырды. Бұл салмақта жартылай финалда Ильяр Аширов (Алматы) пен Дәулет Төлемісов (Ақтөбе облысы), Михаил Коханчик (Қостанай облысы) пен Азамат Бектас (Қызылорда облысы) шаршы алаңға шығады.
92 келіде жартылай финалда Данияр Рахымбердинов (Алматы) пен Нұрсұлтан Ернияз (Алматы облысы), Нурмагамбет Юсупов (Қарағанды облысы) пен Мади Әміров (Алматы) финалға шығу үшін күш сынасады.
92 келі және одан жоғары салмақта жартылай финалға Нұрлан Сапарбай (Түркістан облысы) мен Нұрасыл Асылхан (Шымкент), Даниал Сапарбай (Түркістан облысы) мен Аманат Сабырғали (Атырау облысы) шықты.
Хоккей
Бүгін 03:34
