Бивол мен Бетербиев арасындағы реванш өтуі әлі күнге дейін күмән тудырады

Бокс Бүгін 02:15

Аружан Темірбек

sports24 сарапшы

Еуропа бокс конфедерациясының (EUBC) бас хатшысы Кирилл Щекутьев ресейлік боксшылар Артур Бетербиев пен Дмитрий Бивол арасындағы реванш жекпе-жегінің өту ықтималдығына қатысты күмәнін білдірді.

Сауд Арабиясының Бас ойын-сауық басқармасының төрағасы Турки Әл аш-Шейхтің мәлімдемесіне сәйкес, қос боксшының кездесуі 22 ақпанда Эр-Риядта өтеді деп жоспарлануда. Алайда, Щекутьев бұл жекпе-жектің шын мәнінде ұйымдастырылатынына сенімді емес.

“Шынымды айтсам, бұл реванштың өтетініне күмәнім бар. Осындай бір ішкі түйсігім бар… Егер Бивол мен Бетербиев арасындағы екінші кездесу, көптің қуанышына орай, өтетін болса, менің ойымша, Бетербиев қайтадан жеңеді. Жалпы, мен оның белбеулерін Ресейде қорғағанын қатты қалаймын”, — деп бөлісті Щекутьев “Матч ТВ” арнасына берген сұхбатында.

Естеріңізге сала кетейік, Артур Бетербиев пен Дмитрий Бивол арасындағы алғашқы жекпе-жек 12 қазанда өтті. Төрешілердің шешімімен жеңіс Бетербиевке бұйырып, ол жартылай ауыр салмақта абсолютті әлем чемпионы атағына қол жеткізді.

Кәсіпқой рингте Артур Бетербиев 21 жеңісінен тұратын әсерлі рекордқа ие, оның 20-сы нокаутпен аяқталған. Ал Дмитрий Бивол 23 жеңіс пен бір ғана жеңіліспен кәсіби мансабын жалғастыруда.