Қайрат Сатжанов: "Қазіргі уақытта бізде әлемдегі ең мықты командалардың бірі бар"
Қазақстанның ерлер құрамасы 26 қараша күні Таиландтың Чиангмай қаласына Азия чемпионатына қатысу үшін аттанады.
Бас бапкер Қайрат Сәтжанов команда құрамына қатысты пікір білдіріп, бұл құрамның қазіргі таңда ең үздіктердің бірі екенін атап өтті.
-Қайрат Тұрсынханұлы, чемпионатқа дайындық қалай жүрді? Жазғы жаттығу жиындары мен халықаралық турнирлер болғаны белгілі.
“Қазіргі уақытта бізде әлемдегі ең мықты командалардың бірі бар. Азия чемпионатына дәл осы жігіттер барады. Басқа спорт түрлерінде мұндай терең құрам жоқ деп ойлаймын: 11 халықаралық дәрежедегі спорт шебері, Әлем және Азия чемпиондары, Олимпиада жүлдегерлері.
Жазда біз Украина құрамасымен бірге жаттығу жиынын өткіздік. Осыдан кейін Қарақозы Абдалиевті еске алуға арналған турнирге қатыстық. Бұл Азия чемпионатына дайындық кезеңдерінің бірі болды. Біз барлық құрама мүшелеріне, соның ішінде Олимпиадада өнер көрсеткен боксшыларға да осы турнирге қатысуға нұсқау бердік.
Тек Нұрбек Оралбай, Асланбек Шымбергенов және Қамшыбек Қоңқабаевқа демалыс берілді. Бұл шешім олардың жарақаттарына байланысты қабылданды. Қалған боксшылар Шымкентте рингке шығып, орта есеппен үш-төрт жекпе-жек өткізді. Турнир өте жақсы өтті, қарсыластар да мықты болды. Айта кетейін, жарысқа Түркия, Украина, Өзбекстан, Қырғызстан елдерінен де спортшылар қатысты.
Қазіргі уақытта біз Астанада бірлескен жаттығу жиынын өткізіп жатырмыз. Қазақстан астанасына Ресейдің ұлттық құрамасы келді. Оларда жақында ғана ел чемпионаты өтті, сондықтан бірінші және екінші нөмірлі боксшылары бізбен бірге жаттығуда. Бұдан бөлек, Кубадан бес атақты спортшы келді. Сонымен қатар, дайындық жиынына Грекиядан спортшылар қатысуда. Олардың бәрі біздің Азия чемпионатына дайындығымызға көмектесіп жатыр”, – деп келтіреді бапкердің сөзін olympic.kz.
Айта кетейік, 2024 жылғы Азия чемпионаты 29 қараша мен 11 желтоқсан аралығында өтеді. Жақында Қазақстанның намысын қорғайтын 13 боксшының есімі белгілі болды.
ММА
Бүгін 08:59